2013年1月13日 星期日

值得推介的體驗 - 黑暗中對話


 
有冇諗過於漆黑一片、伸手不見五指既環境感覺如何?聖誕節四處五光十色,若然只能靠觸覺、聽覺、嗅覺去感受,會否依舊歡欣?lazybone早前與朋友參加左一個很有趣的活動 - 黑暗中對話(聖誕版),利用視覺以外的感觀,體驗一個不一樣的聖誕

 

體驗館設於美孚,平日收費$130,假日就要$1708人一團,於網上報名就得。剛好我地一行8人包團,玩得更為盡興


場內設有locker放置隨身物品,職員建議帶小量金錢入場作購物用,而所有發光既物品如電話、手錶都唔建議帶入場內,而帶眼鏡人士亦建議除下眼鏡,反正入到場內咩都睇唔到,有冇眼鏡分別不大啦。入場前聽過簡單講解後,每人就派發一支白杖就開始啦

 
今次我地既導賞員係Eunie,是一位視障人士,於整個75分鐘行程,由佢帶領我地探索場內每一個景區。雖然睇唔到,但Eunie對場館內既佈置同我地既位置都料如指掌,好利害。踏入體驗館雖然伸手不見五指,其實亦無想像中咁驚呢反而起初我地會撞埋一堆,聽到Eunie既指示話呢邊有咩物件又會一窩蜂咁湧埋去摸下,而期間更會經過公園、商舖、馬路、劇院、餐廳日常會到既地方,甚至乎乘搭交通工具(當然係模擬啦)
劇院聽完歌,Eunie仲派紙張同筆等我地寫低心中所想,冇左視力,要於小咭子上寫上字句變得困難,而離開體驗館時更發覺頭先支筆原來冇扭開,根本就寫唔到野,可見失去視力於日常生活上帶出不便

場外75分鐘,但處身體驗館感覺反而冇咁漫長,除左劇院果part,印象最難忘係最後Eunie同我地到場內cafe買野飲同傾偈,可以聽下平時視障人士會遇到既問題及解決方法。科技發達令到人與人之間關係變得疏離,反而於漆黑一片環境中,你會幫我摸下身邊有冇位,拍拍身邊係邊個,感覺反而親近了,其實呢個活動真係值得親身領略呢
另外,平時見到街上的視障人士除拎白杖外,有d仲會拎紅白相間的,原來拎紅白相間的除視力有缺憾外,聽力同樣有問題,所以下次見到佢地不妨伸出援手啦 

 

沒有留言:

張貼留言